巴基斯坦 - mehndi night 女家篇
女主人同我講今晚（4/12 嘅事）要去Farm House 參加婚禮活動，所以今晚要早啲出門口，仲要帶定厚圍巾因為在郊區及戶外比較凍。我以為我聽錯咩farm house ? 難度喺音樂農莊夜晚九點舉行婚禮活動？！ 好奇怪啊！
未講個活動之前又分享一下巴基式時間觀念先，如果你有印度/巴基斯坦朋友試過約你，佢哋例遲三十至六十分鐘係好基本嘅事，佢哋永遠活在佢哋另一個時區，巴基斯坦也是一樣，例如明知今晚九點有婚禮活動要去，但佢哋可以四點半先話出去買鞋，仲要係未睇中個種，出到去先慢慢睇，八點先番屋企化妝換衫，當你趕頭趕命化妝整頭嘅時候，婚禮主人家又會打電話話比你知因為佢哋都出左去買嘢，所以遲一個鐘到都得，係咪好正呢？ 於是乎我就係驚死遲到快快趣換衫化妝，但然後我永遠都喺度等佢哋一家人沖涼換衫仲有食嘢！ 我之後唯有跟佢哋再調整一下巴基式時間先😝
臨出門口，男女主人預備左蚊怕水、水仲有急救箱，全部帶曬厚羊毛圍巾，佢哋話果度好遠市區，有咩事自己有準備好啲，成件事好似去郊區野餐咁，我開始覺得今晚好唔簡單！
上車無耐我已經瞓咗，因為等佢哋可以出到門口已經等到我好眼瞓，我瞓醒已經到左郊區地方連條路都唔同市區特別凹凸。終於到目的地，原來所謂Farm House即係住喺城市嘅人喺郊區買一間好大地方嘅別墅，有泳池有花園又有遊樂設施，得閒放假去住下咁，花園仲有養左啲鴕鳥孔雀，我以為佢哋平時果啲叫豪宅，原來眼前嘅先係，完全就係拍劇有錢人嘅屋企。
呢間farm house 係新娘爸爸嘅公司partner 間屋，特別問佢借嚟比個女有個難忘回憶，喺花園又特別請人搭起一個好靚嘅帳幕，又有枱又有自助餐區，感覺同昨晚男家搞嘅好唔同。之前同大家分享過嘅嫁妝又一次過喺今晚show off 😝比全部親友知道。 關於嫁妝嘅故事可以睇番呢度
https://www.facebook.com/227075223978040/posts/2836744299677773/
大部分親友都已經認得我，一入埸周圍打招呼又攬又錫（只限女性）都用左好多時間。之後例牌又周圍搵D靚女影相，佢哋今晚又唔同曬打扮，連髮形都唔同曬真心好勁。賓客齊人加上一對新人進場坐定定就輪到女家親戚朋友嘅天才表演時間，伴隨住佢哋跳舞嘅音樂首首都係流行經典唔知幾多十年嘅金曲巴基斯坦版本，無論後生嘅好長輩都好，全部都跳得又玩得，越係長輩級上台跳舞台下面就叫得越大聲，好好玩又好瘋狂。在巴基斯坦生活真係要好好學識跳幾隻舞傍身，如果唔係有咩親朋好友結婚又幫唔到手真係好鬼無用😝經過一輪天材表演之後就係自助餐時間，當然唔好想像係有魚生牛扒果種，大家都好瘋狂去食，其實我最佩服所有著到閃令令咁靚嘅女士們依然都係用手食果啲又有汁嘅嘢，我食到好驚啲汁滴落件衫度，果然我就唔係巴基斯坦人。
食完嘢之後大約夜晚十二點，原來女家重金禮聘請左一隊樂隊來表演傳統音樂Qawali ，於是全部人霸頭位聽歌，期間又有唔少長輩會用紙幣打賞比佢哋，佢哋周不時就大叫大唱好興𡚒。不過我完全聽唔明佢哋講咩唱咩，隔左一個鐘之後我就開始有啲悶同眼瞓，於是喺花園周圍行，又發現原來現場有個即煮奶茶檔即刻飲番杯暖吓身先。
之後又去同D小朋友玩吓遊樂設施，問下啲小朋友究竟幾點先完，佢哋話好似天光！雖然男主人佢哋帶埋水煙去，但我不習慣無私人濾嘴所以無去參與吸水煙。神奇在凌晨三點無論大人小朋友依然非常精神，不斷有親友上台自薦合唱，小朋友左周圍跑我開始懷疑我的捱夜能力太差！然後我發現一對新人凌晨三點幾在farm house拍攝相片，由於佢哋唔興影婚紗相，所以婚禮活動會拍攝好多兩個人嘅合照就當婚紗相。
好不容易到凌晨四點，樂隊終於唱完執嘢走，我以為終於曲終~人散，但所有人又跑去再食嘢，好似由頭開始一樣，救命呀，究竟點解佢哋咁捱得嘅？ 完全唔覺得有攰嘅感覺？ 佢哋係咪有秘方咖！
又係一輪講再見嘅環節，嚟嘅時候同幾多個人打招呼，走嘅時候又同幾多個人講拜拜，我上車離開好似4:30 凌晨。回家後沖涼吹頭落妝到真係瞓覺已經係天光了！
奉勸各位如果要參加所有印巴婚禮活動之前盡量休息瞓到日落先起身，否則真係唔夠佢哋玩！講左咁多日其實正式婚禮隔多一日先係，但已經好攰，我而家明白點解mehndi night 之後要比大家休息整整一日先正式婚禮！
*結果第二朝早我瞓到下午兩點半，雙手好攰強列有想去按摩嘅想法
《待續》
別忘了把Facebook專頁為"搶先看"（See first）以及"開啟通知"（Notification On）
較詳盡的更新在Facebook: indiapinkpink
濕濕碎碎的更新在Instagram：indiapink
Search